S-ro Emile Malanda Nianga, unu el la longdaŭraj afrikaj aktivuloj, forpasis la 05-an de januaro 2026 ĉe malsanulejo en Matadio, 250 km de lia hejmurbo Mbanza Ngungu (DR Kongo), post mallonga malsano.
Emile Malanda Nianga naskiĝis la 20-an de decembro 1967 en Kwilu-Ngongo, Demokratia Respubliko Kongo. Li eklernis kaj ekinstruis Esperanton en la fruaj 1990-aj jaroj, kaj ekde 1993 li instruis la lingvon ĉe la Universitato de Kinŝaso. Li fondis Esperanto-Klubon, verkis lernolibron pri Esperanto en la lingala lingvo, projekto kiu celis alporti la internacian lingvon pli proksime al la loka kulturo.
Ekde 1997 li estis individua membro de UEA, kaj li inter 2003 kaj 2006 prezidis DKEA, nacian Asocion de DR Kongo. Li ankaŭ aliĝis al IKEF (Internacia Komerca kaj Ekonomia Fakgrupo) en 2000. Dum sia vivo li partoprenis multajn internaciajn Esperanto-eventojn, inkluzive de Afrikaj Kongresoj, servis kiel kunordiganto de la Afrika Komisiono de UEA kaj estrarano de ILEI.
Li loĝis kelkajn jarojn en Sud-Afriko, sed en 2019 revenis al Kinŝaso por daŭrigi sian laboron en la movado kaj resti pli proksime al sia lando. Li estis ne nur esperantisto, sed ankaŭ amiko kaj mentoro por multaj junaj esperantistoj. Lia familia vivo kaj persona varmo ĉiam reflektis lian sindediĉon al homoj kaj al la idealo de internacia amikeco.
esperanto-afriko.org esprimas sinceran kondolencon al lia familio, amikoj kaj samideanoj. Lia memoro restos kiel inspiro kaj modelo por la afrika kaj tutmonda Esperanto-komunumo.
Kun granda bedaŭro mi legis pri la forpaso de nia kara Emile Malanda. Mi fizike renkontis lin en 2019, tuj post la kongreso kiu okazis en Nyanza Lac, Burundo. Li gastis ĉe ni dum 3 tagoj. Li estis tre bonkora, konsilema kaj ne bruema. KONDOLENCOJN AL LA FAMILIO. Estis perdita granda figuro.
Dankon! Povu Dio helpi pli ol unu inspiriĝi de lia aktivulemo!
Vortoj ne povas esprimi nian malĝojon pro la forpaso de nia esperanta amiko en Afriko. Ne nur lia familio, sed la tuta afrika esperanta komunumo sentas ĉi tiun grandegan perdon. Ni ankaŭ esprimas nian plej profundan kondolencon al lia edzino, infanoj kaj ĉiuj niaj esperantaj amikoj. Dio estu kun vi!
Kun granda bedaŭro kaj malĝojo mi eksciis pri la forpaso de nia delonga esperanto-mentoro kaj amiko en Afriko. Mi laste renkontis lin dum la 6a AKE en Bunda – Tanzanio kaj eĉ helpis lin en lia vojaĝo reen al Sud-Afriko tra Zimbabvo. Ni longe sopiros vian valoran subtenon por la esperanto-movado en Afriko kaj la mondo. Miaj sinceraj kondolencoj al la familio kaj al la tuta esperanto-Afriko kaj la mondo, via animo ripozu en eterna paco. Amen!!!